Fransiyadagi "safarbarlik" va Makronning Ukrainadagi urush bo‘yicha bashorati

Fransiya prezidenti Emmanuel Makron yosh ko‘ngillilarni safarbar qilish rejasini e’lon qildi. Le Monde xabar berishicha, bu kuchlar Fransiya qurolli kuchlarini qo‘llab-quvvatlashga yo‘naltiriladi.

Fransiya prezidenti qurolli kuchlarga murojaatida Fransiyani moslashishga majbur qilayotgan "tahdidlarning to‘planib qolganligini" ta’kidladi.

Nashrning ma’lum qilishicha, 20 yanvar kuni Makron Ukrainadagi urushdan keyin "xavflarning tezlashishi" oldida zarurat tug‘ilganda "qurolli kuchlarni qo‘llab-quvvatlash uchun" ko‘proq yosh ko‘ngillilarni "safarbar qilish" bo‘yicha umumiy rejani e’lon qilgan.

"Keling, o‘zimizni aldamaylik, Ukrainadagi mojaroning ertaga yoki indinga tugashi kutilmaydi," - dedi Makron.

Fransiya prezidenti ta’kidladiki, "bugungi kun sinovining mohiyati Ukrainaga bardosh berish va kelajakdagi har qanday muzokaralarga kuch mavqeidan kirishish imkoniyatini berishdir. Janglar to‘xtagandan so‘ng ertangi vazifa Ukrainaga o‘z hududida urushning qayta boshlanishiga qarshi kafolatlar berish, shuningdek, o‘z xavfsizligimizni ta’minlash bo‘ladi."

Makron hukumat va qurolli kuchlar shtabiga may oyigacha "yosh ko‘ngillilarga qurolli kuchlarda ta’lim olish va ularning saflarini mustahkamlash imkonini berish" bo‘yicha takliflar tayyorlashni so‘rab murojaat qildi. "Biz ko‘ngillilarni yanada yaxshiroq aniqlashimiz, ularni o‘qitishimiz va zarur paytda safarbar qilishimiz, asosiy Fransiya hududida yoki boshqa joylarda armiyani kuchaytira olishimiz kerak," - deya ta’kidladi Fransiya rahbari.