Finlyandiya urush holatiga tayyorlanmoqda

Finlyandiya piyodalarga qarshi minalarni taqiqlash bo‘yicha Ottava konvensiyasidan chiqishga tayyorgarlik ko‘rishni boshlaydi. Bu haqda mamlakat hukumati rasmiy veb-saytida e’lon qilindi.

"Hozirgi kunda Finlyandiya bevosita harbiy tahdid ostida emas. Ottava shartnomasining bekor qilinishi bizga xavfsizlik sohasidagi o‘zgarishlarga yanada ko‘proq usullar bilan tayyorgarlik ko‘rish imkoniyatini beradi," - dedi mamlakat bosh vaziri Petteri Orpo.

Fin bosh vazirining ta’kidlashicha, Xelsinki tashqi siyosatining asosiy maqsadlari "Finlyandiyaning mustaqilligi va hududiy yaxlitligini ta’minlash, mamlakatning harbiy mojarolarga aralashib qolishining oldini olish hamda fin xalqining xavfsizligi va farovonligini kafolatlashdan iborat."

Bundan tashqari, Finlyandiya Davlat kengashi (hukumati) 2029 yilga qadar mudofaa xarajatlarini yalpi ichki mahsulotning kamida uch foizigacha oshirish to‘g‘risida qaror qabul qildi.

Shuni ta’kidlash lozimki, Ottava konvensiyasi 1997 yil 3 dekabrda imzolangan va 1999 yil 1 martdan e’tiboran kuchga kirgan. Mazkur konvensiyaga 163 ta davlat qo‘shilgan.