Eron yadroviy qurolga ega bo‘lish bilan tahdid qilmoqda

Eron oliy rahbarining katta maslahatchisi Ali Larijoniyning aytishicha, Tehron AQSh yoki uning ittifoqchilari tomonidan hujumga uchrasa, yadroviy qurol yaratishga majbur bo‘ladi. Bu haqda u Eron davlat televideniyesi orqali aytdi.

“Biz yadro quroliga ega bo‘lmoqchi emasmiz, lekin agar xato qilsangiz, o‘zingiz Eronni bunga undaysiz, chunki mamlakat o‘zini himoya qilishi kerak”, - deya ta’kidladi Larijoniy. Uning so‘zlariga ko‘ra, bosim ostida Eronning “boshqa tanlovi qolmaydi”.

Bu bayonot Donald Tramp Eron yadroviy dasturi bo‘yicha muzokaralarga rozi bo‘lmasa, “misli ko‘rilmagan bombardimon qilish” bilan tahdid qilganidan keyin yangradi. Oliy rahnamo Ali Xomanaiy bunga javoban tashqi tajovuz sodir bo‘lgan taqdirda “qattiq qasos olish” haqida ogohlantirgan.