Erdo‘g‘on va Tramp ikki tomonlama munosabatlar va global muammolarni muhokama qildi

Turkiya va AQSh prezidentlari Rajab Toyyib Erdo‘g‘on va Donald Tramp telefon orqali muloqot qildi.

Bu haqda Turkiya prezidenti ma’muriyati ma’lum qildi.

Tomonlar ikki tomonlama munosabatlar, shuningdek, mintaqaviy va global muammolarni muhokama qildilar.

Erdo‘g‘on Turkiya va AQSh o‘rtasidagi hamkorlikning yangi davrda ittifoqchi davlatlar sifatida rivojlanishiga ishonch bildirdi.

U AQSh prezidentining Rossiya va Ukraina o‘rtasidagi urushni to‘xtatish bo‘yicha qat’iy qadamlarini qo‘llab-quvvatlab, Turkiya mojaroning boshidan beri adolatli va barqaror tinchlikka erishish uchun sa’y-harakatlarni amalga oshirayotganini va bu yo‘lda ishlashni davom ettirishini qayd etdi.

Erdo‘g‘on Suriyada barqarorlikni tiklash bo‘yicha birgalikdagi sa’y-harakatlar, yangi hukumat faoliyati va suriyaliklarning o‘z vatanlariga qaytishiga imkon beradigan vaziyatni normallashtirish uchun sanksiyalarni bekor qilish muhimligini ta’kidladi.

Turkiya rahbari, AQShning yangi davrda terrorizmga qarshi kurashda qadam tashlashi kutilayotganini qayd etib, shuningdek, ikki davlat o‘rtasida mudofaa sanoati sohasida hamkorlikni rivojlantirish uchun CAATSA sanksiyalarini bekor qilish, F-16 yetkazib berish jarayonini yakunlash va Turkiyani F-35 dasturiga qaytarish zarurligini ta’kidladi.