Ekvadordagi qurolli hujumlarda 9 kishi halok bo‘ldi

Ekvador g‘arbida sodir etilgan ikkita qurolli hujumda kamida to‘qqiz kishi halok bo‘ldi. Bu haqda payshanba kuni mahalliy OAV xabar berdi.

Payshanba kuni erta tongda polisiya 17 dan 25 yoshgacha bo‘lgan olti erkakning jasadini topdi.

Mahalliy matbuot xabarlariga ko‘ra, jasadlarning ba’zilari bog‘langan va o‘qdan jarohat olgan. Ular polisiya tomonidan Manabi provinsiyasining Manta port shahridagi sud-tibbiyot markaziga olib ketilgan.

Chorshanba oqshomida xuddi shu provinsiyadagi Baxiya-de-Karakes shahrida bir oilaning uch nafar a’zosi halok bo‘ldi.

Polisiya ma’lumotlariga ko‘ra, Ekvadorning Tinch okeani sohilidagi asosiy giyohvand moddalar savdosi mintaqasi bo‘lgan Manabida bu yil zo‘ravonlik ko‘paygan, ko‘plab jinoyatlar uyushgan jinoyatchilik bilan bog‘liq.

Bunga javoban hukumat mojaro zonalarida jinoiy guruhlarga qarshi kurashish uchun polisiya va harbiy kuchlarni joylashtirdi. Yanvar oyida mamlakat prezidenti Daniel Noboa mamlakatda "terrorchi" deb tasniflangan 22 jinoiy guruhga qarshi "ichki qurolli mojaro" rejimini e’lon qilgan edi.