Evropa Ittifoqining kengayish bo‘yicha komissari Marta Kos Yevroparlamentning Tashqi aloqalar qo‘mitasi yig‘ilishida so‘zga chiqib, Gruziyadagi nodavlat notijorat tashkilotlari va fuqarolik jamiyatlari institutlari qo‘llab-quvvatlanishini bildirdi. YEI avval muzlatib qo‘yilgan 100 million yevroni ayni maqsadga yo‘naltiradi. Bu mablag‘ dastlab Gruziya hukumati uchun mo‘ljallangan edi.
Shuningdek, Kos ushbu Kavkaz davlati NNT uchun 8,5 million yevro belgilangani, yaqin orada hukmron partiya rahbariyati tomonidan tarqatilgan noxolis axborotga qarshi qaratilgan “aloqa faoliyati” uchun qo‘shimcha 7 million yevro ajratilishini ma’lum qildi.
Ta’kidlanishicha, yanvar oyi oxirigacha YEIga a’zo davlatlar Tbilisi bilan viza kelishuvini qisman to‘xtatib turish uchun ovoz beradi.
