Buyuk Britaniya bosh vaziri: "AQSh va Ukraina kelishib olgan reja yakuniy emas"

Qo‘shma Shtatlar va Ukraina Jenevadagi muzokaralar chog‘ida muhokama qilingan yangilangan tinchlik rejasiga kelishib oldi, ammo bu hali yakuniy kelishuv emas.

Bu haqda Britaniya bosh vaziri Kir Starmer parlamentdagi chiqishi chog‘ida ma’lum qildi.

"Bu hech qanday yangi takliflar yoki kelishuvlar to‘plami emas", dedi u.

Starmerning so‘zlariga ko‘ra, reja ustidagi ishlar davom etmoqda va yakuniy kelishuvga hali erishilmagan bo‘lsa-da, oldinga muhim qadamlar qo‘yildi. Bosh vazirning ta’kidlashicha, Rossiya-Ukraina urushida to‘liq tinchlikka erishish uchun hali uzoq va mashaqqatli yo‘l bor.

Ukraina prezidenti Vladimir Zelenskiydan AQShning tinchlik taklifini qabul qilgani haqidagi xabarlarga izoh berish so‘ralganida, Starmer u bilan 25 noyabr kuni ertalab gaplashganini aytdi va bu Ukrainaning tinchlik rejasiga to‘liq roziligi emas, balki faqat muzokaralardagi taraqqiyotga taalluqli ekanini qo‘shimcha qildi.

AQSh tomonidan taklif qilingan 28 banddan iborat dastlabki reja sezilarli darajada o‘zgartirildi va 19 tagacha qisqartirildi. Kiyev tinchlik kelishuvining asosiy asosiga rozi bo‘ldi, eng nozik masalalar esa Vladimir Zelenskiy va Donald Tramp tomonidan muhokama qilinadi.

Starmerning so‘zlariga ko‘ra, Vashingtonning tinchlik rejasining dastlabki loyihasi “qabul qilib bo‘lmaydigan” fikrlarni o‘z ichiga olgan bo‘lsa-da, “adolatli va mustahkam tinchlik uchun zarur bo‘lgan” elementlarni ham o‘z ichiga olgan. Bundan tashqari, Britaniya bosh vaziri Ukrainada adolatli va mustahkam tinchlik o‘rnatish uchun to‘rtta shartni, jumladan, mamlakat suvereniteti va kelajakda o‘zini himoya qilish qobiliyatini saqlab qolishni belgilab berdi.