Tadbirga tashkilotga a’zo Ozarbayjon, Qozog‘iston, Qirg‘iziston, Turkiya va O‘zbekiston hamda kuzatuvchi davlat - Vengriya bojxona xizmati rahbarlari, Turkiy davlatlar tashkiloti kotibiyati tashrif buyurgan. Shuningdek, Gruziya bojxona xizmati rahbari faxriy mehmon sifatida ishtirok etmoqda.
Mehmonlar dastlab Bojxona qo‘mitasining Markaziy bojxona laboratoriyasi, Bojxona rasmiylashtiruvi markazi hamda ushbu majmuadadan o‘rin olgan Ma’lumotlarni qayta ishlash markazi, Markazlashtirilgan masofaviy elektron deklarasiyalash posti, “Call-markaz”, Targetlash va xavflarni monitoring qilish boshqarmasi faoliyati bilan tanishib, sohani raqamlashtirish yo‘nalishida erishilgan eng ilg‘or yutuqlarni e’tirof etishdi.
