Moskva talabiga ko‘ra, Tramp Kelloggni Ukraina bo‘yicha vakillikdan chetlatdi

AQSh prezidentining Ukraina bo‘yicha maxsus vakili Kit Kellogg Moskva uni ishtirokchilar orasida ko‘rishni istamasligini bildirgach, urushni tugatish bo‘yicha oliy darajadagi muzokaralardan chetlashtirildi.

Bu haqda NBC News telekanali Amerika ma’muriyati vakili va rossiyalik yuqori martabali amaldorga tayanib xabar berdi.

Telekanal manbalariga ko‘ra, Rossiya prezidenti Vladimir Putin Kelloggni o‘ta "ukrainaparast" deb hisoblagan, shu sababli Moskva uni muzokaralar jarayonidan chetlashtirish masalasini ko‘targan.

"Kellogg - sobiq amerikalik general, u Ukrainaga juda yaqin. U biz muzokaralar stolida ko‘rishga tayyor bo‘lgan odam emas", - dedi Rossiya rasmiysi. AQSh prezidenti Donald Tramp ma’muriyati vakili Moskva Kelloggning ishtirokiga norozilik bildirganini tasdiqladi. Biroq, u Oq uyga bu talab haqida aniq qachon xabar berilganiga aniqlik kirita olmadi.

Iste’fodagi general-leytenant Kit Kellogg Saudiya Arabistonida yaqinda o‘tkazilgan ikki sammitda ishtirok etmadi: biri Rossiya rasmiylari, ikkinchisi Ukraina delegatlari bilan. Rasmiy ravishda muzokaralar jarayoni hali ham uning vakolati doirasida qolmoqda.

NBC Newsning Kellogg ofisiga uning yo‘qligi va Rossiya haqiqatan ham uni chetlashtirishni talab qilganmi yoki yo‘qligi haqida ma’lumot so‘rashi javobsiz qoldi.

Ayni paytda Milliy xavfsizlik kengashi matbuot kotibi Jeyms Xyuittning ta’kidlashicha, Tramp Ukrainadagi vaziyatni tinch yo‘l bilan hal etishga ko‘maklashish uchun "keng doiradagi yuqori martabali amaldorlarni" jalb qiladi. U, shuningdek, Kit Kellogg "jamoaning qimmatli a’zosi" bo‘lib qolayotganini ta’kidladi, ayniqsa Yevropa ittifoqchilari bilan muvofiqlashtirish masalalarida.