Bolakayning qo‘lidagi tatuirovka hayotini saqlab qoldi

Xitoyda polisiya yo‘qolgan bolani topdi, uning qo‘lida esa onasining mobil raqami yozilgandi. Bu haqda “South China Morning Post” xabar bermoqda.

Bolakayni Xitoyning Chjeszyan provinsiyasidagi Venchjou va Taychjou shaharlari orasidagi katta avtomobil yo‘li bo‘ylab ketayotganida ko‘rib qolishgan. Uning qo‘lida ikkita mobil telefon raqamlari yozilgan bo‘lib, shulardan biri o‘chirib tashlangandi.

Hodisa haqidagi xabarda bola bir necha kun oldin uydan g‘oyib bo‘lgani, polisiyachilarning birorta ham savoliga javob bera olmagani qayd etilgan. Keyinchalik ma’lum bo‘lishicha, yo‘qolgan bolakayning ruhiy holati bilan bog‘liq muammolari bo‘lgan. O‘smir uyidan kechasi ota-onasi uxlab yotgan paytda qochib ketgan. Ruhiy holati yomon bo‘lganligi sababli uyiga boradigan yo‘lni esidan chiqarib qo‘ygan.

Polisiyachilar bolaning qo‘lidagi raqamga telefon qilishganida ularga onasi javob bergan va bir necha soatdan keyin kelib farzandini olib ketgan.

Ta’kidlash joizki, mahalliy ijtimoiy tarmoq vakillari tatuirovka g‘oyasini ijobiy baholashdi. Polisiya esa bolarning yo‘qolish holatlari kamayishi uchun boshqa ota-onalarga ham mana shunday maslahat bermoqda.