Boeing aviahalokatda halok bo‘lgan BMT xodimi uchun 28 million dollardan ko‘proq to‘laydigan bo‘ldi

Chikago federal sudi hakamlar hay’ati Boeing kompaniyasiga 2019 yilda Efiopiyada Boeing 737 MAX halokatida halok bo‘lgan Birlashgan Millatlar Tashkilotining atrof-muhit bo‘yicha xodimi Shikxa Garjning oilasiga 28 million dollardan ko‘proq pul to‘lashga majbur qildi.

Bu haqda Reuters agentligi xabar berdi.

Foizlarni hisobga olgan holda uning oilasi 35,85 million dollar oladi, deb yozadi agentlik.

Da’vo arizasida 737 MAX samolyoti dizaynida nuqsonlar borligi va Boeing yo‘lovchilar va aholini xavf haqida ogohlantirmagani aytilgan. Oilaning advokatlariga iqtibos keltirgan holda, hukm "Boeingning noqonuniy xatti-harakatlari uchun jamoatchilik oldida javobgarlikni ta’minlaydi". Ular, shuningdek, Boeing shikoyat qilmasligini ta’kidladilar.

Efiopiyaning Addis-Abeba shahridan Keniya poytaxti Nayrobiga yo‘l olgan Ethiopian Airlines aviakompaniyasining 302-reysi havoga ko‘tarilganidan bir necha daqiqa o‘tib halokatga uchradi. Bundan besh oy oldin Lion Air aviakompaniyasining samolyoti Indoneziya yaqinida Yava dengiziga qulagan edi. Ushbu ofatlarda jami 346 kishi halok bo‘lgan. Har ikkala halokatga ham aviakompaniyaning parvozlarni boshqarishning avtomatlashtirilgan tizimi sabab bo‘lgan.

Bu ikki samolyot halokatidan keyin qo‘zg‘atilgan o‘nlab da’volarning birinchisi. Agentlik ma’lumotlariga ko‘ra, kompaniya avariyalar bilan bog‘liq da’volarning 90 foizdan ortig‘ini qondirib, milliardlab dollar tovon to‘lagan.