BBC: Buyuk Britaniya Rossiya agentlarini ro‘yxatdan o‘tishga majbur qiladi

Tez orada Rossiya hukumati va uning Buyuk Britaniyadagi alohida tuzilmalaridan buyruqlarni bajaruvchi odamlar Moskva bilan aloqalari haqida e’lon qilishlari talab qilinadi.

Buyuk Britaniya ichki ishlar vaziri o‘rinbosari Den Jarvis seshanba kuni parlamentda chiqish qilib, Rossiyani “dushman davlatlarning ikkinchi guruhi”ga kiritish rejalashtirilayotganini e’lon qildi. Ushbu davlatlar bilan hamkorlik qilish kengaytirilgan ro‘yxatdan o‘tishni talab qiladi.

Britaniya xorijiy davlatlarning agentlarini yangi “Xorijiy ta’sirni ro‘yxatga olish” mexanizmi (FIRS) doirasida ro‘yxatdan o‘tkazmoqchi. Bu mexanizm 1 iyuldan boshlab ishga tushirilishi rejalashtirilgan.

Britaniya hukumati kengaytirilgan talablar bo‘yicha hozircha faqat Eron va Rossiyani ushbu guruhga kiritishga qaror qilgan. FIRS Britaniyaga zarar yetkazish niyatida bo‘lishi mumkin bo‘lgan xorijiy davlatlarni ikkita darajaga ajratadi.

Birinchi guruh davlatlari uchun faqat Britaniya siyosatiga bevosita ta’sir o‘tkazishga urinishlar deklarasiya qilinishi talab etiladi. Ikkinchi guruhga kiritilgan davlatlar (hozircha faqat Eron va Rossiya) bilan bog‘liq holatda esa, nafaqat britaniyalik siyosatchilar bilan aloqalar, balki hukumat belgilaydigan boshqa faoliyat turlari ham deklarasiya qilinishi kerak bo‘ladi.

Ro‘yxatdan o‘tish talabini bajarmaganlar besh yilgacha qamoq jazosiga hukm qilinishi mumkin.