O‘zbekiston tashqi ishlar vaziri Baxtiyor Saidov Birlashgan Arab Amirliklarining bir qancha yuqori martabali rasmiylari bilan ko‘rishdi. Rasmiy relizga ko‘ra, uchrashuvda ikki mamlakat aholisi uchun qulay shart-sharoitlarni yaratishga e’tibor qaratilgan.
Vazirlik matbuot xizmatiga ko‘ra, Baxtiyor Saidov 13 yanvar kuni dastlab BAA bosh vazir o‘rinbosari va ichki ishlar vaziri shayx Sayf bin Zoid Ol Nahayon bilan uchrashuv o‘tkazdi.
«Biz BAA hukumatining davlatlarimiz o‘rtasidagi hamkorlik kun tartibini ilgari surish yo‘lidagi doimiy ko‘magini qadrlaymiz. Uchrashuvda hamkorlikning bir qancha muhim masalalarini muhokama qildik va ikki mamlakat aholisi uchun eng qulay shart-sharoitlarni yaratishga alohida e’tibor qaratdik», — deyiladi xabarda.
BAA tarafi tarqatgan xabarga ko‘ra, tomonlar mamlakatlar o‘rtasidagi do‘stlik va hamkorlik munosabatlari va ularni ko‘plab sohalarda mustahkamlash istiqbollarini muhokama qilgan.
