Armaniston Rossiyaning temir yo‘llarni boshqarish huquqini qayta ko‘rib chiqishi mumkin

Nikol Pashinyan Armaniston temir yo‘llarini boshqarish huquqini sotish ehtimolini istisno qilmadi.

Armaniston mamlakat temir yo‘llarini boshqarish bo‘yicha Rossiya konsessiyasini to‘liq yoki qisman sotish imkoniyatini ko‘rib chiqmoqda. Bosh vazir Nikol Pashinyan Yerevan Moskva bilan murosali yechim topish va vaziyatning keskinlashib ketishining oldini olishga umid qilayotganini bildirdi.

Hukumat rahbarining so‘zlariga ko‘ra, Armaniston tomoni masalani «do‘stona yo‘l bilan hal qilish»dan manfaatdor. «Biz bir-birimizning manfaatlarimizni tushunishimiz va murosaga borishimiz kerak», — dedi Pashinyan. U konsessiyaning keyingi taqdiri bo‘yicha bir nechta ehtimoliy variant muhokama qilinayotganini ta’kidladi.

Bosh vazir muammo temir yo‘llarning Rossiya tomonidan boshqarilayotganida emasligini ta’kidladi. Uning so‘zlariga ko‘ra, Yerevan Armanistonni xalqaro transport yo‘nalishlariga integrasiya qilish uchun «tarixiy imkoniyat»ni qo‘ldan boy berishdan xavotirda.

Pashinyan Armaniston temir yo‘l infratuzilmasining ehtimoliy yirik foydalanuvchilari hozircha investisiya kiritishga qiziqish bildirmayotgani va mamlakatni chetlab o‘tuvchi muqobil yo‘nalishlarni ko‘rib chiqayotganini qayd etdi.

Hukumat rahbari bu masalani Armanistonning tashqi iqtisodiy aloqalarni diversifikasiya qilishga qaratilgan kengroq siyosati bilan ham bog‘ladi.

Evroosiyo iqtisodiy ittifoqi (EOII) bilan hamkorlik haqida fikr bildirgan Pashinyanning ta’kidlashicha, Moskva, Yerevan fikricha, munosabatlarning «eksklyuziv» xususiyatga ega bo‘lishini istamoqda. «Biz har qanday holatda ham munosabatlarni diversifikasiya qilishimiz kerak. Eksport bilan bog‘liq muammolar hal qilingan taqdirda ham, kun tartibimiz o‘zgarmaydi», — dedi Pashinyan.