Arag‘chi: "AQSh muloqotga jiddiy yondashayotganiga amin emasmiz"

Tehron Vashingtonning mojaroni diplomatik yo‘l bilan hal qilish borasidagi jiddiyligiga amin emas.

Eron tashqi ishlar vaziri Abbos Arag‘chi bu haqda Islomobodga tashrifidan so‘ng ijtimoiy tarmoqlarda yozgan.

"Pokistonga juda samarali tashrif bo‘ldi, uning xayrixohligi va mintaqamizda tinchlikni tiklash bo‘yicha birodarlik sa’y-harakatlarini yuqori baholaymiz.

Men Eronga qarshi urushni yakuniy tugatish bo‘yicha samarali reja bo‘yicha Eronning pozisiyasini bayon qildim. AQSh diplomatiyaga chindan ham jiddiy yondashadimi yoki yo‘qmi, buni vaqt ko‘rsatadi", deb ta’kidladi Arag‘chi.

Avvalroq Eron tashqi ishlar vaziri Islomobodda Pokiston Qurolli Kuchlari boshlig‘i Asim Munir va Bosh vazir Shahboz Sharif bilan uchrashgan edi. Arag‘chi Tehronning AQSh va Isroil bilan urushni tugatish bo‘yicha pozisiyasini Pokiston tomoniga yetkazdi.