AQSh Markaziy qo‘mondonligi rahbari Isroilni Eronga qarshi hujumlarni davom ettirishga chaqirdi

AQSh Markaziy qo‘mondonligi (CENTCOM) rahbari admiral Bred Kuper Isroilga tashrifi chog‘ida Eronga qarshi zarbalarni qayta tiklashga chaqirdi.

Bu haqda Isroilning 13-kanali xabar berdi.

Kuper o‘tgan hafta Isroilga tashrif buyurdi va Isroil Mudofaa Kuchlari Oliy Operasiyalar Forumining Isroil armiyasi shtab boshlig‘i Eyal Zamir va boshqa yuqori lavozimli harbiy amaldorlar bilan uchrashuvida ishtirok etdi.

Kanal ma’lumotlariga ko‘ra, amerikalik admiral Isroil harbiylariga Eronga qarshi harbiy operasiyalarni qayta tiklash va milliy infratuzilmani, jumladan, gaz, neft va energetika inshootlarini nishonga olish zarurligini aytdi.

"Erondagi infratuzilmaga hujumlar o‘yinni o‘zgartiradi va jiddiy zarar keltiradi. Hozirgi vaziyatda eronliklar o‘z pozisiyalarini o‘zgartirmaydilar", dedi Kuper.

Harbiy rahbar shuningdek, AQShning Eronga qarshi harbiy operasiyalarni qayta tiklashdan boshqa chorasi qolmasligi mumkinligini ta’kidladi.

Avvalroq, Eron manbasi Reuters agentligiga Qo‘shma Shtatlar bilan sulhni uzaytirish bo‘yicha muzokaralar davom etmayotganini aytgan edi. Uning qo‘shimcha qilishicha, Tehron sulh hech qachon kuchga kirmagan deb hisoblaydi, chunki Vashington kelishuvga erishilganidan 48 soat o‘tgach uni buzgan.