AQSh harbiylari Ho‘rmuz bo‘g‘ozini minalash ehtimoli haqidagi xabarlardan so‘ng Eronning mina qo‘yuvchi kemalarini yo‘q qilmoqchi

"Qo‘shma Shtatlar Eron kemalariga, jumladan minalash uchun ishlatiladigan 16 ta katerga bir qator zarbalar berdi. Bu zarbalar Eron Ho‘rmuz bo‘g‘ozini minalashni rejalashtirayotgani haqidagi xabarlar ortidan amalga oshirildi", deya ma’lum qildi AQSh qurolli kuchlari Markaziy qo‘mondonligi (CENTCOM).

Ho‘rmuz bo‘g‘ozi yaqinida Eronning mina qo‘yuvchi katerlari yo‘q qilinganini AQSh prezidenti Donald Tramp ham o‘zining Truth Social ijtimoiy tarmog‘ida tasdiqladi.

Ho‘rmuz bo‘g‘ozi Yaqin Sharq mamlakatlaridan neft tashish uchun eng muhim yo‘laklardan biri hisoblanadi. Isroil va AQShning Eronga qarshi urushi boshlanganidan buyon ushbu bo‘g‘oz orqali fuqaroviy kemalar deyarli harakatlanmayapti.

Islom inqilobi qo‘riqchilari korpusi AQSh va Isroil mamlakatga hujumlarni davom ettirar ekan, Eron mintaqa orqali bir litr ham neft eksport qilinishiga yo‘l qo‘ymasligini ma’lum qildi. Errn ayrim istisnolarni faqat o‘z hududidan amerikalik va isroillik diplomatlarni chiqarib yuborgan davlatlar uchun qo‘llashni taklif qildi.