AQSh amerikaliklarni Yaqin Sharqdagi 10 dan ortiq mamlakatni zudlik bilan tark etishga chaqirdi

AQSh Davlat departamenti mintaqadagi keskinlashuv tufayli Yaqin Sharqdagi 10 dan ortiq mamlakatni zudlik bilan tark etishni tavsiya qildi.

AQSh Davlat kotibining konsullik ishlari bo‘yicha yordamchisi Mora Namdar bu haqda ijtimoiy tarmoqda yozgan.

"AQSh Davlat kotibi Marko Rubio va Davlat departamenti jiddiy xavfsizlik xavflari tufayli amerikaliklarni quyidagi mamlakatlardan mavjud bo‘lgan har qanday tijorat transport vositalaridan foydalanib, darhol chiqib ketishga chaqiradi", deb yozgan u.

Ro‘yxatga Bahrayn, Misr, Eron, Iroq, Isroil, G‘azo sektori, Iordaniya, Quvayt, Livan, Ummon, Qatar, Saudiya Arabistoni, Suriya, BAA va Yaman kiradi.

28 fevral kuni AQSh va Isroil Eronga qarshi harbiy operasiyani boshladilar va respublikadagi shaharlarga havo hujumlarini uyushtirdilar. Eron bunga javoban Isroil hududiga raketalar otdi. Bundan tashqari, Eron kuchlari Yaqin Sharqning bir qator mamlakatlarida joylashgan AQSh harbiy bazalariga hujum qildi. Yaqin Sharqdagi vaziyat tufayli mintaqadagi bir nechta mamlakatlar o‘z havo maydonlarini vaqtincha yopib qo‘yishdi. 28 fevral kuni AQSh va Isroilning havo hujumlari natijasida Eronning Oliy rahbari Oyatulloh Ali Xomenei o‘z ofisida o‘ldirildi.