Antaliya dunyoning eng yaxshi 10 turizm manzili ro‘yxatidan joy oldi

Etakchi tadqiqot tashkilotlaridan biri bo‘lgan Euromonitor sifat, barqarorlik va yo‘nalishlarni boshqarish mezonlariga asoslangan “Dunyodagi eng yaxshi 10 turizm yo‘nalishi” ro‘yxatini e’lon qildi. Antaliya Los-Anjeles va Dubayni ortda qoldirib, 5-o‘rinni egalladi hamda Turkiyadan ushbu ro‘yxatga kiritilgan birinchi va yagona shahar bo‘ldi.

Euromonitor 2025 yilga doir tadqiqotlar doirasida avval “Dunyoning eng ko‘p sayyoh tashrif buyuradigan shaharlari”, so‘ng esa “Dunyoning eng yaxshi 10 turizm yo‘nalishi” ro‘yxatini e’lon qildi. Ikkinchi ro‘yxat nafaqat sayyohlar soni, balki manzillarning uzoq muddatli turizm samaradorligini baholagani bilan alohida e’tiborga loyiq.

Tadqiqot doirasida turizm infratuzilmasi, iqtisodiy va tijoriy samaradorlik, bandlik hamda ishchi kuchi salohiyati, turizm siyosatining izchilligi, sog‘liqni saqlash va xavfsizlik sharoitlari, ekologik hamda ijtimoiy barqarorlik kabi yo‘nalishlar bo‘yicha 50 dan ortiq ko‘rsatkichlar tahlil qilindi. Tadqiqotning asosiy maqsadi nafaqat qancha sayyohlarni jalb qilishini, balki ular turizmni qanchalik sog‘lom, muvozanatli va barqaror boshqarishini ham aniqlashdir. Mazkur tadqiqot dunyo bo‘ylab 100 ta turli turizm va dam olish manzillarini qamrab oladi.

Tadqiqot natijalariga ko‘ra, 2025 yil uchun dunyoning eng yaxshi 10 ta turizm manzili quyidagi tartibda e’tirof etildi:

1. Orlando

2. Nyu-York

3. Makka

4. Parij

5. Antaliya

6. Madina

7. Los-Anjeles

8. Dubay

9. Kankun

10. Kioto

Ro‘yxatga kiritilgan manzillarning aksariyati shahar turizmi bilan tanilgan bo‘lsa, Antaliya kurort turizmi yo‘nalishidagi yagona maskan sifatida alohida ajralib turadi.

Antaliyaning ilk beshlikka kirishida mustahkam turar joy infratuzilmasi, mahsulot xilma-xilligi, zamonaviy aeroport, rivojlangan transport imkoniyatlari, oilaviy qulay turizm xizmatlari, tabiat bilan uyg‘un dam olish konsepsiyasi va texnologiyaga moslashuvchanligi muhim rol o‘ynadi. Baholashlarda, shuningdek, sayyohlarning tajribasi va mamnunligiga asoslangan fikr-mulohazalar ham hal qiluvchi omil bo‘lganligi qayd etilgan.

Antaliyaning ushbu ro‘yxatga ilk bor kirishi Turkiya turizmining sifat jihatidan yangi bosqichga o‘tayotganidan dalolat beradi. Kelgusi yillarda shunga o‘xshash indekslarda barqarorlik, yo‘nalish boshqaruvi va sifatga yo‘naltirilgan mezonlar yanada hal qiluvchi omil bo‘lishi kutilmoqda.