Afg‘onistonda to‘yda qatnashgan yigitlarning sochi kalga olindi

“Tolibon” Badaxshon viloyatidagi to‘yda qatnashgan 12 yigitni hibsga olib, ularning sochini kalga oldirdi. Bu haqda Hasht-e Subh Daily xabar berdi.

Manbalarda aytilishicha, 22 fevral kuni “Tolibon” a’zolari Arg‘oy tumanidagi Tergani qishlog‘idagi to‘yxonaga bostirib kirgan. Ular 12 nafar yigitni omma oldida qamchilagandan keyin hibsga olib, qamoqqa tashlagan. “Tolibon” bu yigitlarni keyinchalik garov sababli ozod qilgani aytilmoqda.

Ta’kidlanishicha, “ayblanuvchilar” qishlog‘ida bo‘lib o‘tgan to‘yda musiqa chalgan. Badaxshondagi mahalliy “Tolibon” hukumati hozircha bunga munosabat bildirmayapti. Afg‘onistonda “Tolibon” hokimiyatga kelgach, to‘y va madaniy dasturlar kabi tadbirlarda musiqa chalish, tinglash taqiqlandi.