1500 tanker Netanyaxuga murojaat qildi

Isroil zirhli korpusining 1500 dan ortiq xodimi, jumladan generallar hukumatdan G‘azoda garovga olinganlarni ozod qilish uchun urushni to‘xtatishni talab qilib petisiyani imzoladi.

Isroilning Maariv nashri xabar berishicha, petisiyani 1525 kishi imzolagan: ular orasida sobiq bosh vazir va Bosh shtab rahbari Ehud Barak, Markaziy qo‘mondonlikning sobiq rahbari Amram Mitzna, shtab sobiq rahbari Den Halutz, harbiy razvedka va zirhli korpusning sobiq rahbarlari bor. Murojaatda “garovga olinganlarni ozod qilish uchun barcha imkoniyatlarni ishga solish, hatto bu jangni to‘xtatish bo‘lsa ham” talab qilinadi va bu bugungi kunda davlatning ustuvor vazifasi bo‘lishi kerakligi aytiladi.

Hujjat shu kabi tashabbuslar to‘lqinining bir qismidir: payshanba kunidan beri, Anadolu agentligi ma’lumotlariga ko‘ra, harbiy xizmatchilarning G‘azodagi urushni to‘xtatishga chaqiruvchi kamida o‘nta petisiyasi chop etilgan. Bosh vazir Benyamin Netanyaxu bunga javoban bunday murojaatlarni imzolagan barcha faol askarlarni ishdan bo‘shatish bilan tahdid qildi.

Isroil 18-mart kuni G‘azoga hujumini davom ettirib, 19-yanvardagi o‘t ochishni to‘xtatish va asir almashishni buzdi. 2023-yil oktyabridan buyon eksklavda 51 mingga yaqin falastinlik halok bo‘ldi, ularning aksariyati ayollar va bolalar. Xalqaro jinoiy sudi Netanyaxu va sobiq mudofaa vaziri Galantni hibsga olishga order berdi, Isroil Gaagada genosid ishi bilan yuzlashmoqda.