Politico nashrining yozishicha, Italiyaning tarqoq so‘l kuchlari yangi yetakchiga ega bo‘ldi va u tez fursatda o‘ng qanot bosh vaziri Jorjiya Melonining raqibiga aylanib bormoqda.
Bolg‘a uloqtirish bo‘yicha sobiq Olimpiya o‘yinlari ishtirokchisi, hozirda Genuya meri lavozimida ishlayotgan Silviya Salis shu oy boshida shimoliy port shahridagi Matteotti maydonida ulkan texno-kecha tashkil qilib, butun mamlakat e’tiborini tortdi. Uning didjeylik pulti oldida tushgan suratlari ijtimoiy tarmoqlarda tez tarqaldi.
Bu holat bosh vazirlik lavozimidagi ilk ishini noqonuniy kechalarga qarshi kurashishdan boshlagan Meloni bilan keskin farqni yuzaga keltirdi.
Uning Italiya siyosiy sahnasiga chiqishi so‘l kuchlarning revanshi uchun eng qulay paytga to‘g‘ri keldi. Mart oyida Meloni hukumati sud tizimini isloh qilish bo‘yicha referendumda qattiq mag‘lubiyatga uchradi. Bu esa kelgusi yil oxirigacha o‘tkazilishi kerak bo‘lgan umumiy saylovlarda g‘alaba qozonish imkoniyatini his qilgan muxolifat partiyalariga yangi ishonch bag‘ishladi.
Biroq, bundan oldin so‘l kuchlarga Melonini mag‘lub eta oladigan yetakchi kerak bo‘ladi. 40 yoshli Salis hozircha bu rol unga tegishlimi yoki yo‘qligi haqidagi savolga noaniq javob bermoqda. Ammo mart oyi boshida u: "Agar kelajakda milliy siyosat meni qiziqtirmaydi desam, yolg‘on gapirgan bo‘laman", deb tan olgandi.
