Tramp Putin bilan qayerda uchrashishini ochiqladi

AQSh prezidenti Donald Tramp rossiyalik hamkasbi Vladimir Putin bilan Budapeshtda uchrashishini ma’lum qildi.

Tramp bu haqda Truth Social ijtimoiy platformasida yozdi.

"Rossiya prezidenti Vladimir Putin bilan telefon suhbatini hozirgina yakunladim va bu juda samarali bo‘ldi. Prezident Putin meni va AQShni Yaqin Sharqda tinchlik o‘rnatishda erishilgan ulkan yutuq bilan tabrikladi. Uning aytishicha, bu asrlar davomida orzu bo‘lib kelgan. Yaqin Sharqdagi muvaffaqiyat Rossiya va Ukraina o‘rtasidagi urushni tugatish bo‘yicha muzokaralarda natijalarga erishishga yordam berishiga chin dildan ishonaman", deyiladi postda.

Trampning so‘zlariga ko‘ra, u va Putin Ukraina bilan urush tugaganidan keyin Rossiya va AQSh o‘rtasidagi savdo istiqbollarini ham keng muhokama qilgan.

"Suhbatimiz yakunida kelasi haftada oliy darajadagi maslahatchilarimizning uchrashuviga kelishib oldik. Dastlabki uchrashuvlarni Amerika tomonida Davlat kotibi Marko Rubio olib boradi. Joy hozircha aniqlanmagan. Keyin prezident Putin va men kelishilgan joyda - Budapeshtda, Vengriyada uchrashamiz - Rossiya va Tramp o‘rtasidagi bu shafqatsiz urushni to‘xtata olamizmi yoki yo‘qmi".

U ertaga Oval kabinetda Ukraina prezidenti Vladimir Zelenskiy bilan uchrashuvda Putin bilan suhbati natijalarini va boshqa ko‘p narsalarni muhokama qiladi, degan xulosaga keldi. "Bugungi telefon qo‘ng‘irog‘i katta muvaffaqiyatga erishganiga ishonaman", dedi Tramp.