AQSh Isroilni qanday qutqarmoqchi?

AQSh Harbiy-dengiz kuchlari Eron tomonidan Isroilga qilingan raketa hujumlarini qaytarishda ishtirok etdi. NBC News telekanaliga ikki amerikalik amaldor ma’lum qilishicha, raketalarni yo‘q qilishda nafaqat AQSh kemalari, balki yerga o‘rnatilgan havo mudofaa tizimlari ham jalb qilingan.

Manbalar aynan qachon bu voqea sodir bo‘lganini va nechta raketa yo‘q qilinganini aniq ko‘rsatmagan. Ammo ularning aytishicha, hujum nisbatan kam sonli maqsadlarga qaratilgan.

Nizo kuchayishi va Isroilning yordam so‘rovi fonida AQSh mintaqadagi harbiy mavjudligini oshirdi. Eron qirg‘oqlariga Nimitz aviakreyseri yuborildi. U mintaqada allaqachon bo‘lgan Carl Vinson aviakreyseriga qo‘shildi, uning bortida 36 ta F/A-18 qiruvchi va 12 ta eng yangi F-35 qiruvchilari joylashgan.

Shu bilan birga, AQSh Yevropadagi bazalardan havo yoqilg‘isini to‘ldiruvchi samolyotlarni keng ko‘lamda ko‘chirishni boshladi. Military Watch ma’lumotlariga ko‘ra, 16 iyun tongida ittifoqchi aerodromlarga 30 ta KC-135 va KC-46 samolyoti yetib kelgan. Ular havoda nafaqat amerikalik, balki isroillik aviasiyani ham yoqilg‘i bilan ta’minlaydi.

2024 yil kuzidan boshlab Yaqin Sharqda taxminan 43 ming amerikalik harbiy joylashgan. Mintaqada shuningdek, ballistik va qanotli raketalarga qarshi mudofaa tizimlari ham mavjud. Ushbu kuchlar 2024 yilda Eron raketalarini yo‘q qilish uchun ishlatilgan.

AQSh prezidenti Donald Tramp ilgari Tehrondan to‘liq taslim bo‘lishni talab qilgan.

«SHARTSIZ TASLIM BO‘LISh», — deb yozgan u o‘zining Truth Social ijtimoiy tarmog‘ida.

Shuningdek, u AQSh Eronning havo hududini nazorat qilishini aytgan. Uning so‘zlariga ko‘ra, Eronning mudofaa uskunalari amerikalik uskunalar bilan raqobatlasha olmaydi.

«Eronning yaxshi radar va boshqa mudofaa uskunalari bor edi, va ularning ko‘pligi ham bor edi, lekin ular AQShda ishlab chiqilgan va ishlab chiqarilgan amerikalik uskunalar bilan taqqoslanmaydi», — deb ta’kidlagan u.