Ukraina dronlari Mordoviya, Tula va Yaroslavl viloyatlariga, shuningdek, Moskvaga hujum qildi

Rossiya Mudofaa vazirligining xabar berishicha, 7 mayga o‘tar kechasi Ukraina dronlari Rossiyaning bir necha hududlariga, jumladan Mordoviya, Tula va Yaroslavl viloyatlariga hujum uyushtirdi. Bundan tashqari, Moskvaga yaqinlashgan paytda dronlar havo hujumidan mudofaa kuchlari tomonidan urib tushirildi.

Moskva meri Sergey Sobyanin soat tungi 00:00 dan boshlab Moskva viloyati havo hujumidan mudofaa kuchlari to‘qqizta dron hujumini qaytarganini ma’lum qildi. Jarohatlanganlar haqida xabar berilmagan. Ukrain Telegram kanallarining yozishicha, dronlar Moskva yaqinidagi Kubinka harbiy ayerodromiga hujum qilgan, u yerda qiruvchi samolyotlar joylashgan.

Tula viloyati gubernatori Dmitriy Milyayev viloyatga beshta dron hujumi uyushtirilganini bildirdi. Ukrain Telegram kanallariga ko‘ra, Tuladagi dronlar “Grad”, “Smerch”, “Uragan” kabi raketa tizimlarini ishlab chiqaruvchi “Splav” ilmiy-ishlab chiqarish birlashmasiga hujum qilgan.

Shuningdek, dronlar Mordoviyaga ham hujum qilgan. Saransk shahri ma’muriyati 7 may kuni bolalar bog‘chalari, maktablar, kollejlar va oliygohlarda darslar bekor qilinganini ma’lum qildi. Avvalroq Mordoviya rahbari Artyom Zdunov shaharda dron tahdidi haqida ogohlantirgan va tezkor shtab dron hujumlari oqibatlarini suratga olish va tarqatishni taqiqlagan.

Xabarlarga ko‘ra, Saranskdagi “Saranskkabel” va “Saranskkabel-Optika” zavodlari nishonga olingan.