Украина АҚШни Россияга ёрдам бераётганликда айбламоқда.

Украина президенти Владимир Зеленский Россиянинг нефтьни қайта ишлаш заводларига (НҚИЗ) зарбаларни қайта бошлашга қарор қилди. Аввалроқ у АҚШ президенти Дональд Трамп ва миллиардер Илон Маскни украиналик ҳарбийларнинг Starlink тизимидан фойдаланиш имкониятини чеклаётганликда айблаган эди. Вашингтон ва Киев ўртасидаги кескинлик кучаймоқда.

Зеленский Financial Times нашрига берган интервьюсида Трамп эълон қилган «энергетик сулҳ»га риоя қилиш мақсадида Россия нефтьни қайта ишлаш заводларига ҳужумларни уч кунга тўхтатганини айтди. Бироқ Москва Украина энергетика объектларига ҳужумларни давом эттирган. Шу сабабли Украина ҳам жавоб зарбаларини қайта бошламоқда.

Зеленский Лондонга ташрифи чоғида Трампни кескин танқид қилди.

«Агар сиз икки томоннинг ўртасида бўлсангиз, ўртада қолишингиз керак, нотўғри томоннинг ёнини олмаслигингиз лозим. Менимча, Трампнинг маслаҳатчилари хато қилмоқда. Уни нотўғри томонга ким ундаётганини билмайман. Бу тарихнинг сиз туришингиз керак бўлган томони эмас», — деди Украина президенти.

Зеленский, шунингдек, Украина ўз ҳудудларини ҳеч кимга бермаслигини таъкидлади.

«Биз еримизни сотмаймиз. Қулоқ солинг, одамлар, гап биз учун қандайдир битимлар ҳақида эмас. Гап бизнинг ҳаётимиз ҳақида кетмоқда», — дея қайд этди у.

Аввалроқ Украина ҳукуматининг юқори мартабали вакили АҚШни Россиянинг ракета зарбалари ҳақидаги разведка маълумотларини узатишни тўхтатиш ва Starlink тизимидан фойдаланишни чеклаш орқали Владимир Путинга манфаатли вазият яратишда айблаган эди.

«Россияга қандайдир сабабга кўра ёрдам берилаётгани аён», — деди украиналик расмий.

Унинг таъкидлашича, АҚШ икки марта Россия ракеталари учирилгани ҳақида Украинани огоҳлантирмаган. Бундан ташқари, Starlink интернети тезлиги ҳам чекланган.

Starlink — Илон Маскка тегишли SpaceX компаниясининг сунъий йўлдош алоқа тизими бўлиб, Украина армияси учун фронтдаги муҳим алоқа воситаларидан бири ҳисобланади.

Украинанинг танқидларига жавобан Маск тизим АҚШга тегишли эканини ва унинг фаолияти ўз назоратида эканини таъкидлаган. Унинг изоҳига кўра, ҳар қандай чекловлар АҚШ ҳарбийлари ва якунда мамлакат президенти томонидан белгиланади.

АҚШ ҳукумати вакили эса разведка маълумотларини алмашиш тўхтатилгани ҳақидаги айбловларни рад этди.

НАТО бош котиби Марк Рютте Дональд Трамп унга АҚШ ва Украина ўртасидаги разведка маълумотлари алмашинуви тўхтатилмаганини билдирганини маълум қилди.

Европа Иттифоқи ҳам Украинага ахборот узатиш тўхтатилганига оид «ҳеч қандай белгиларни» кўрмаётганини билдирди.

Германия ташқи ишлар вазири Йоханн Вадефул эса Берлинда АҚШнинг Украинага кўрсатаётган ёрдами «сезиларли даражада камайганини» кузатмаётганини айтди.