Зеленский Путинни тўхтатиш усулини топди

Ғарб Россия президенти Владимир Путинни тўхтатиши мумкин, бунинг учун, хусусан, Россияга қарши санкцияларни бекор қилмасдан, аксинча уларни максимал даражада кучайтириши керак, дея маълум қилди Украина президенти Владимир Зеленский Лондондаги саммит якунлари бўйича журналистларга.

Унинг таъкидлашича, Россия иқтисодиёти жуда оғир аҳволда бўлиб, бу аҳвол янада ёмонлашади.

"Нефть ва энергия манбаларининг нархини тушириш - бу бир масала. Яширин флот, банк тизими ҳам буларнинг ҳаммаси эмас. Путин санкцияларни четлаб ўтадиган барча алоқаларни узиш керак. Санкцияларни четлаб ўтишга кўмаклашаётган мамлакатларни назоратга олиш лозим. Улар россияликлар билан дўст бўлгани учун эмас, балки бундан пул ишлаётганлари сабабли шундай қилишмоқда. Бу мамлакатларга муқобил таклиф қилиш керак - бундай имкониятлар мавжуд. Россияликлар арзон газ беряптими? Худди шундай таклиф қилинг. Барча алоқаларни узиб, тўлиқ санкциялар жорий этинг," - деди у.

Зеленский қўшимча қилишича, бу Россия иқтисодиёти инқирозининг тезлашишига олиб келади.

"Мана бизнинг режамиз. Мана бу санкциялар ҳозир амал қилмоқда. Агар тўхтамасангиз, эртага жорий қиладиган санкцияларимиз рўйхати мана. Бу санкциялардан ташқари, Украинага берадиган қурол-аслаҳаларимиз тўплами ҳам бор. Биз уларга шундай қуролларни берамизки, улар билан Россиянинг бутун энергетика тизими ва ҳарбий заводларини йўқ қилади. Натижада, Россиянинг нафақат иқтисодиёти, балки қурол-яроғ, ракеталар ва бошқа техникаларни ишлаб чиқариш қобилияти ҳам пасайиб боради," дея таъкидлади Украина президенти.

Зеленский, шунингдек, Ғарбни Москвага замонавий технологияларни етказиб бераётган компаниялар ва мамлакатларга кўпроқ эътибор қаратишга чақирди.