Зеленский Путинга Киевда музокаралар ўтказишни таклиф қилдими?

Украина президенти бу ҳақда ABC News телеканалига берган интервьюсида айтди. Унинг фикрича, Путиннинг Москвада учрашув ўтказиш ғояси вақтни чўзишга қаратилган.

"Ҳар куни мамлакатим ракета зарбалари ва ҳужумларга учраётган бир пайтда мен Москвага бора олмайман. Мен бу террорчиларнинг пойтахтига бора олмайман", — дея таъкидлади Зеленский.

Украина президентининг бошқа баёнотлари:

◾️ Афсуски, биз Аляскадаги учрашувда қатнашмадик. Менимча, Путин президент Трампдан ўзи хоҳлаган нарсаларни олди. Бу жуда ачинарли;

◾️ Путин мен билан учрашишни хоҳламайди, лекин у АҚШ президенти билан учрашишни жудаям истайди. У барчага Трамп билан тушган видеолар ва суратларни кўрсатишни хоҳлайди;

◾️ Россияга қўшимча босим керак, буни барча яхши тушунади. Бизга Қўшма Штатларнинг босими зарур;

◾️ Менимча, президент Трампнинг европаликлар ҳақидаги қараши тўғри. Мен барча ҳамкорларимиздан миннатдорман, лекин уларнинг баъзилари ҳали ҳам Россия нефти ва газини сотиб олишда давом этишмоқда. Бу адолатсизлик. Шунинг учун биз Россиядан энергия манбаларини сотиб олишни бутунлай тўхтатишимиз зарур. Бу қотилни тўхтатишнинг энг самарали йўлларидан бири. Биз унинг қуролини олиб қўйишимиз керак. Унинг қуроли — бу энергия ресурслари;

◾️ Мен АҚШ президенти Доналд Трампга ҳар қандай учрашувга тайёрлигимни, лекин бу Россияда бўлмаслигини айтганман;

◾️ Украинадаги ҳар қандай хавфсизлик кафолатлари фақатгина бизнинг армиямизга асосланиши мумкин;

◾️ Путин Уиткоффга йил охиригача Донбассни тўлиқ эгаллаб олишини айтган. У бундай қилолмайди. Бунинг учун узоқ йиллар ва миллионлаб одамларнинг ҳаёти керак бўлади. Агар Россия буни тезлаштирмоқчи бўлса, бир миллион эмас, балки 2-3 миллион ҳарбийсидан айрилади;

◾️ Путин мен билан учрашишни хоҳламаганлиги учун қабул қилинмаслиги аниқ бўлган таклифларни илгари сурмоқда, бу унинг тактикаси;

◾️ Украинада “буфер зона” ташкил этиш режаси катта хато. Бизда аллақачон “буфер зона” бор, бу дронлар чизиғи. Бизда 10-20 км кенгликдаги “ўлим зоналари” мавжуд. Бу ҳудудга кирган ҳар қандай танк ёки зирҳли техника дронлар томонидан йўқ қилинади;

◾️ Донбассда бизнинг кучли қўшинларимиз жойлашган, бу мустаҳкамланган ҳудудлардир.