Зеленский АҚШдан Patriot ракеталарини ишлаб чиқариш лицензиясини сўради

Украина президенти Владимир Зеленский АҚШдан Patriot ҳаво мудофаа ракеталарини мамлакат ичида ишлаб чиқариш учун лицензия беришни сўради.

Унинг маълум қилишича, бу ҳақдаги мактуб Оқ уй ва АҚШ Конгрессига юборилган.

«Мен Оқ уй ва Конгрессга хат юбордим. Уларнинг бу масалани тушуниб, муносабат билдиришига умид қиламан. Бу илтимосни аввалги АҚШ маъмуриятига ҳам, ҳозирги маъмуриятга ҳам билдирганман.

Бу бизга ёрдам беради. Бу Яқин Шарққа ва АҚШ қўллаб-қувватлашга қарор қилган бошқа мамлакатларга ҳам ёрдам беради. Европа ўзининг замонавий ракетага қарши мудофаа тизимини ишлаб чиқмагунча, бизга АҚШ кўмаги зарур бўлади», — деди Зеленский.

Шунингдек, Украина президенти бугун Германия Украинага IRIS-T ҳаво мудофаа тизими учун янги учириш қурилмасини топширганини ҳам маълум қилди.