Замбия терма жамоасининг сўнгги дақиқаларда урган голи фожиага айланиб кетай деди (видео)

Замбия терма жамоаси ҳужумчиси Патсон Дака голни нишонлаш пайтида ўзини деярли майиб қилиб қўйишга сал қолди.

Африка миллатлари кубоги — 2025 мусобақасининг 1-турида футболчи учрашувнинг 90+2-дақиқасида Мали терма жамоаси дарвозасига гол уриб, ҳисобни тенглаштирди. Голни нишонлаш чоғида 27 ёшли форвард ҳис-туйғуларини жиловлай олмай, сальто қилишга уринди, аммо боши билан ерга тикка тушди. Йиқилгандан сўнг футболчи бир муддат газонда ётиб қолди. Ижобий жиҳати шундаки, омадсиз акробатик ҳаракат жиддий жароҳатга олиб келмади.

Кейинги учрашувда Замбия терма жамоаси Комор ороллари терма жамоасига қарши майдонга тушади. Ўйин 26 декабрь куни бўлиб ўтади. Учинчи турда эса жамоа Марокаш терма жамоасига қарши баҳс олиб боради.

Эслатиб ўтамиз, Патсон Дака 2021 йилдан бери Англиянинг «Лестер Сити» клуби шарафини ҳимоя қилиб келмоқда.