Яқин Шарқдаги можаро сабаб 2030 йилда 520 млн киши оч қолиши мумкин

Бу фикрни БМТнинг Озиқ-овқат ва қишлоқ хўжалиги ташкилоти (ФАО)нинг Россиядаги алоқа бюроси раҳбари Олег Кобяков билдирди. ФАОнинг 2026-йилги «Жаҳонда озиқ-овқат хавфсизлиги ва овқатланиш ҳолати» ҳисоботида таъкидланишича, можаро бошланишидан олдин қилинган прогнозларда 2030 йилда очликка дучор бўлганлар сони тахминан 503 миллион кишини ташкил этиши кутилган. Ташкилотнинг таъкидлашича, Яқин Шарқдаги можаро энергия ва ўғитлар нархининг ошиши орқали бошқа мамлакатлардаги озиқ-овқат тизимларига ҳам таъсир кўрсатиши мумкин. Ғалла ва бошқа қишлоқ хўжалиги маҳсулотларини етиштириш учун зарур бўлган ресурсларнинг қимматлашиши озиқ-овқат нархларига босимни кучайтириши мумкин. ФАО ушбу прогнозларда вазиятни янада мураккаблаштириши мумкин бўлган баъзи омиллар, жумладан, экстремал об-ҳаво ҳодисалари ва Эл-Нино таъсири тўлиқ ҳисобга олинмаганини таъкидлади. Шунинг учун келажакдаги кўрсаткичлар янада юқори бўлиши мумкин. Шу билан бирга, ФАО маълумотларига кўра, 2025 йилда дунёда 645 миллион киши очликка дуч келган. Бу кўрсаткич 2024 йилга нисбатан қарийб 14 млн кишига, 2022 йилга нисбатан эса 43 млн кишига камайган. Ташкилот таъкидлашича, глобал очлик камайганига қарамай, бу жараён ҳали ҳам секин ва турли инқирозларга жуда заиф бўлиб қолмоқда.