Япониянинг янги бош вазири Трамп билан учрашиш орқали ўзининг энг катта синовига дуч келмоқда

Япониянинг янги бош вазири Санаэ Такаичи учун илк катта халқаро синов — АҚШ президенти Дональд Трамп билан учрашув бўлади. Бу учрашув унинг дипломатик тажрибасини ва сиёсий нуфузини синовдан ўтказади.

Такаичи сешанба куни Император Нарухито билан Император саройида бўлиб ўтадиган инаугурация маросимида қатнашиш учун бош вазирлик идорасини тарк этди. Унинг раҳбар сифатидаги фаолияти шу кундан расман бошланди.

Япония раҳбари бўлишидан бир неча ой аввал Такаичи Трамп билан учрашишга таклиф қилинган, аммо ўша пайтдаги бош вазир Сигэру Ишиба АҚШнинг янги президенти билан илк бўлиб учрашиши лозимлигини билдиргани сабабли, у бу таклифни рад этган эди.
«Бир кун келиб, у билан муносиб даражада учрашиш имконига эга бўлиш учун қаттиқ меҳнат қилишни мақсад қилганман», — деб ёзган эди Такаичи ўзининг ижтимоий тармоқдаги саҳифасида.

Эндиликда ўша кун келди. Такаичининг глобал саҳнадаги илк йирик чиқиши Малайзиядаги АСЕАН саммити ва Жанубий Кореядаги APEC йиғилиши билан боғлиқ бўлади. Энг муҳим воқеа эса Трампнинг Токио ташрифи чоғида Такаичи билан илк учрашуви бўлади.

Air Force One бортида Трамп журналистларга Такаичи ҳақида юқори фикр билдирди:
«У жуда яхши, гўзал ва самимий аёл», — деди АҚШ президенти. Улар шанба куни телефон орқали суҳбат қурган ва Трамп бу суҳбатни «жуда яхши» деб баҳолаган.

Япониянинг янги бош вазири учун бу учрашувнинг аҳамияти катта. АҚШ-Япония иттифоқи дунёдаги энг кучли ҳамкорликлардан бири саналади, аммо Такаичининг чекланган дипломатик тажрибаси ва Трампнинг кутилмаган сиёсий ёндашуви музокараларни жиддий синовга айлантириши мумкин.

Учрашувда тарифлар, минтақавий хавфсизлик ва Япониянинг мудофаа харажатлари каби масалалар муҳокама қилиниши кутилмоқда. Япониянинг ҳукмрон Либерал-демократик партияси ичида баъзилар АҚШнинг Ҳинд-Тинч океани минтақасига бўлган эътибори сусайиб бораётганидан хавотирда.

Ички сиёсий майдонда эса Такаичи коррупция можароларидан кейин партиянинг нуфузини тиклаш вазифасига дуч келмоқда. Унинг маќуллаш рейтинги ҳозирда 71 фоизни ташкил этади ва бу кўрсаткични сақлаб қолиш ҳукумат жамоаси учун муҳим ҳисобланади.