Жорий йилнинг 14 май куни ижтимоий тармоқларида “Энди ўқитувчилар кафель ва газон учун пул берадиганга ўхшайди!” сарлавҳали матн эълон қилинди. Мазкур матнда Хоразм вилояти Хонқа тумани ўқитувчилар номидан тумандаги барча мактабларга газонли футбол майдони қурасан, ҳожатхонага кафель ёпиштирасан деган талаб қўйилаётганлиги ва бунинг учун ўқитувчилар маошидан турли баҳоналар қилиб ушлаб қолишлари ҳақидаги маълумот юзасидан вилоят халқ таълими бошқармаси қуйидагиларни маълум қилади.
Ўрганиш натижаларига кўра ижтимоий тармоқларда келтирилган мактаб Хонқа туманидаги 28-сонли мактаб эканлиги аниқланди. Мазкур мактабда шартнома асосида тадбиркор Ҳайитбоев Шаҳзод Қувондиқ ўғли томонидан мактабнинг бўш турган майдонида ижара асосида суньий қопламали спорт майдончаси қурилиш ишларининг 45 фоизи амалга оширилган.
Мактаб ҳожатхонаси 2019 йил июль ойида қайта таъмирдан чиқарилган бўлиб, қониқарли ҳолатда.
Мактаб директори, Х.Ниёзметов тушунтириш хатида мактаб ўқитувчилари билан ҳожатхона ва суньий қопламали спорт майдончаси юзасидан ҳеч қандай топшириқлар бўлмаганлиги ва мактаб хожатхонаси талабга жавоб бериши, таъмирга муҳтож эмаслиги ҳақида маълумот берди.
Вилоятдаги умумтаълим мактабларида Хоразм вилоят ҳокимининг 2019 йил 26 сентябрь “Умумий ўрта таълим мактабларида давлат – хусусий шерикчилик шартлари асосида замонавий сунъий қопламали спорт майдонларини ташкил этиш” тўғрисидаги 623қ-сонли қарори асосида мактаблар ҳудудида фойдаланмасдан бўш турган қисмидан тасарруф этиш ҳуқуқисиз “сунъий қопламали мини футбол майдончаси” қурилиши учун шартнома асосида тадбиркорларга ер майдони ажратиб берилган ва қурилиш ишлари олиб борилмоқда. Вилоятда жами 540 та мактабдан 25 тасида суньий қопламали спорт майдончалари қурилиб битказилган бўлса, 144 та мактабда қурилиш ишлари ҳали давом этиб турибди.
Ушбу сунъий спорт майдони ёшлар ўртасида футбол ва бошқа оммавий спорт мусобақаларини ўтказиш мақсадида қурилаётган бўлиб, келгусида ўқувчи ёшларнинг мунтазам равишда спорт билан шуғулланишларини таъминлайди. Шунингдек, шартномада соат эрталабки 8:30 дан 17:00 гача ўқиш даврида ўқувчилар мазкур суньий қопламали спорт майдончасидан бепул фойдаланишлари, соат 17:00 дан кейин эса маҳаллада яшовчилар белгиланган тўлов асосида фойдаланишлари кўрсатиб ўтилган.
Ушбу спорт майдончаларини қуришдан асосий мақсад ўқувчи ёшларни мунтазам равишда спорт билан шуғулланиб, соғлом бўлиб етишишларини таъминлашдан иборатдир.
Ўзбекистон Республикаси Президенти раҳбарлигида 2020 йил 2 март куни ўтказилган 12-сонли йиғилиш баёнининг 12-бандида маҳаллий бюджет ва асосан хомийлар маблағлари ҳисобидан санитария-гигена талаблари ва намунавий лойиҳалар асосида мактаб ҳожатхоналарини 2020/2021 ўқув йили бошлангунга қадар янгидан қуриш (таъмирлаш) вазифаси топширилган. Ушбу баён ижросини таъминлаш мақсадида вилоятдаги умумтаълим мактаб ҳожатхоналари вилоят ҳокими Ф.Эрмановнинг 2020 йил 30 мартдаги “2020 йилда Хоразм вилояти халқ таълими тизимидаги таълим муассасаларининг ҳожатхоналарини таъмирлаш бўйича чора-тадбирлар дастури” га асосан, 4 та секторга ажратилган ҳолда қурилиш таъмирлаш ишлари олиб борилмоқда. Бугунги кунда жами 540 та мактаб ҳожатхоналаридан 155 тасида жорий таъмирлаш, 156 тасида капитал таъмирлаш ва 82 тасида янгидан ҳожатхона қуриш режалаштирилган. Сунъий майдон ва ҳожатхоналарнинг таъмири ва қурилишига ўқитувчи ёки мактаб директорларига ҳеч қандай моддий мажбурият юкланган эмас.
Юқоридагилардан келиб чиқиб, Хоразм вилоят халқ таълими бошқармаси Ахборот хизмати Хонқа туманидаги 28-сонли мактабда сунъий қопламали спорт майдончаси қурилиши бевосита тадбиркор томонидан амалга оширилаётганлиги ҳамда мактабдаги ҳожатхона талаб даражасида эканлигини инобатга олиб, ўқитувчилар маошидан ушлаб қолиш ҳақидаги маълумот ўз тасдиғини топмаганлигини маълум қилади.