Хитой яширин равишда ядровий қуролни синаб кўрган ва янги авлод тизимларини яратмоқда

Хитой яширин равишда ядровий қуролни синаб кўрган ва янги авлод тизимларини яратмоқда — CNN.

Телеканалнинг манбаларга таяниб хабар беришича, АҚШ разведка хизматлари Хитой янги авлод ядровий қуролини ишлаб чиққан ва 2020 йилда яширин синовларни ўтказган, деб ҳисобламоқда.

Вашингтон маълумотларига кўра, синов 2020 йил июн ойида Хитойнинг шимолий–ғарбидаги Лоб-Нор полигонида ўтказилган. Мазкур синовлар Пекиннинг 1996 йилдан бери амал қилаётган ядровий синовлар бўйича ихтиёрий мораторийсига қарамасдан амалга оширилган.

АҚШ давлат котибининг Қуролларни назорат қилиш бўйича ўринбосари синов портлашининг натижасида юзага келган ер силкиниши тахминан 2,75 магнитудага етганини ва унинг зилзила ёки тоғ-кон ишлари билан боғлиқ эмаслигини таъкидлаган.

CNN манбалари фикрича, аниқланган ҳаракатлар бир ракетада бир нечта кичик ядро каллакларини таший оладиган тизимларни яратиш, шунингдек, кам қувватли тактик ядровий қуроллар ишлаб чиқиш билан боғлиқ бўлиши мумкин.