Хитой Россияга уруш учун СИ технологияларини етказиб бермоқда

DW'нинг ёзишича, Россия ва Хитой ўртасидаги ҳарбий ҳамкорлик аввалроқ ўйланганидан анча чуқурроқ бўлиб чиқди.

"The Insider", "Der Spiegel" ва "Le Monde" журналистлари Москва ва Пекин ўртасидаги махфий музокараларга оид ҳужжатларни ўрганиб чиқиб, шундай хулосага келишмоқда.

Суриштирувга кўра, Хитой Россияга сунъий интеллект, учувчи ўқ-дорилар, шунингдек, ҳаво ва ракетага қарши мудофаа тизимлари соҳасидаги технологияларни таклиф қилган. Бунинг эвазига Москва ушбу ишланмаларни Украинадаги уруш шароитида синовдан ўтказиши ва натижаларни Пекинга топшириши керак эди.

Ҳужжатлар, шунингдек, "Starlink" сунъий йўлдош тизимига қарши курашишда ҳамкорлик қилинаётганидан далолат беради. Муҳокама қилинган чоралар қаторида дипломатик босим, орбитал позициялар учун рақобат ва ҳатто тармоқ инфратузилмасига киберҳужумлар уюштириш тилга олинган.

Бундан ташқари, томонлар технологиялар ва бутловчи қисмлар алмашинувини муҳокама қилишган: Хитой микросхемалар ва электроника етказиб бериши, Россия эса хомашё ҳамда Ғарб санкциялари туфайли Пекин учун чеккланган тақчил компонентларни тақдим этиши кўзда тутилган.

"Хитой бу Европанинг хавфсизлик соҳасидаги манфаатларининг энг муҳим нуқтасига дахл қилишини тушуниши керак", — деб баёнот берди Германия ТИВ раҳбари Йоханн Вадефул ва Пекин томонидан Россия қуролли кучларига кенг кўламли ёрдам берилаётгани ҳақидаги маълумотлар "ўта хавотирли" эканини ҳам қўшимча қилди.