АҚШ президенти Доналд Трамп шу ҳафта Москвага қарши санкциялар жорий қилиш имкониятини кўриб чиқмоқда, чунки у Россиянинг Украинага уюштираётган ҳужумларидан тобора кўпроқ норози бўлмоқда, деб ёзади газета ўз манбаларига таяниб.
Нашр суҳбатдошларидан бирининг айтишича, агар санкциялар жорий қилинса ҳам, улар янги молиявий чекловларни ўз ичига олмайди. Бироқ Россия етакчиси Владимир Путинга музокара столи ортида ён беришга мажбур қилиш учун бошқа босим чоралари муҳокама қилинмоқда. Улар орасида Россия доим рад этиб келаётган 30 кунлик ўт очишни тўхтатишга рози бўлиш талаби ҳам бор.
Аввалроқ Трамп ўтган ҳафта охирида Украинага қилинган кенг кўламли ҳужумдан сўнг санкциялар киритиш эҳтимоли ҳақида гапирган эди. Кейинроқ у яна Путинни кескин танқид қилиб, уни "бутунлай ақлдан озган" деб атади.
"Трамп тинч йўл билан можарони ҳал қилишга уринишлардан чарчаган ва агар бу саъй-ҳаракатлар самара бермаса, музокаралардан бутунлай воз кечиш эҳтимолини кўриб чиқмоқда. Бироқ Қўшма Штатлар музокаралардан чиқса нима бўлиши ва Трамп Киевга ҳарбий ёрдамни давом эттирадими-йўқми бу ҳозирча номаълум, деб ёзади нашр.
"Президент Трамп музокаралар йўли билан эришилган тинчлик келишувини кўришни истаётганини аниқ билдириб ўтган", — дейилади Оқ уй матбуот котиби Кэролайн Ливиттнинг WSJ'га берган баёнотида.
Вашингтон музокаралардан чиқиши мумкинлиги ҳақида Тhe New York Times ҳам ёзган эди. Бироқ ушбу нашр манбаларига кўра, Трамп Европа етакчиларига Москвага қарши санкциялар босимини кучайтириш нияти йўқлигини билдирган.
