Вучич: "Сербияни оғир даврлар кутмоқда"

Сербияни оғир даврлар кутмоқда ва мамлакатни тўғри йўлга қайтариш фақат Сербия тараққиёт партиясининг (SNS) қўлидан келади.

Бу ҳақда «Бирлашган Сербия» коалицияси етакчиси Александр Вучич Informer телеканалига берган интервьюсида маълум қилди.

Унинг таъкидлашича, SNS барча сиёсий ҳаракатлар ва фаоллар билан мулоқот қилишга тайёр.

«Биз катта тажрибага эга, оғир синовлардан тобланган инсонлармиз. 2000 йилда ҳам шунга ўхшаш қийинчиликларга дуч келганмиз, ғалаба қозонганмиз, мамлакат қиёфасини ўзгартирганмиз ва қўшимча равишда 550 мингта иш ўрни яратганмиз. Умид қиламанки, бу сафар бу ишларни амалга ошириш учун шунчалик узоқ кутишимизга тўғри келмайди. Ишончим комилки, биз буни яна бир бор уддалай оламиз», — дея таъкидлаган Вучич.

У «Талабалар рўйхати»ни мамлакат тарихидаги энг ёмон сиёсий муқобил деб атаган ва ушбу ҳаракат вакиллари мамлакатни бошқариш учун етарли сиёсий тажриба ҳамда жиддий билимларга эга эмаслигини билдирган.

Вучичнинг сўзларига кўра, «Талабалар рўйхати» шакллантирадиган янги ҳукумат Сербия манфаатларига қарши қаратилган сиёсат олиб боради. Унинг таъкидлашича, бундай ҳукумат Сербиянинг БМТ Бош Ассамблеяси доирасида эришган натижаларини, жумладан, серблар геноциди масаласи бўйича эришилган ютуқларни йўqqa чиқариши мумкин.