Бу йилги Осиёдаги энг кучли тўфон бўлган «Яги» тўфони Вьетнам шимолида ўнлаб одамларнинг ҳаётига зомин бўлди, инфратузилма ва заводларга катта зарар етди.
Вьетнам ҳукуматининг билдиришича, 49 киши ҳалок бўлган, 22 киши бедарак йўқолган, асосан тўфон сабаб бўлган кўчки ва тошқинлар туфайли.
Тўфон шанба куни Вьетнамнинг шимоли-шарқий қирғоғига, маҳаллий ва хорижий компанияларнинг йирик ишлаб чиқариш корхоналари жойлашган ҳудудга етиб келди. Якшанба куни у тропик депрессия даражасига туширилди , аммо метеорология агентлиги душанба куни яна сув тошқинлари ва кўчкилар ҳақида огоҳлантирди.
Яги миллионлаб уй хўжаликлари ва компанияларнинг электр энергиясини узиб қўйди, магистраль йўлларни сув босди, телекоммуникация тармоқларини бузди, кўприк ва минглаб дарахтларни қулатди ва кўплаб саноат марказларида иқтисодий фаолиятни тўхтатди.
Икки миллион кишилик қирғоқ шаҳар бўлган Хайфонгдаги саноат парклари ва фабрикалари раҳбарлари ва ишчилари душанба куни электр энергияси йўқлигини ва ёмғир кўпроқ ёғиши кутилаётгани сабабли металл плитали томлари учиб кетган заводлардан жиҳозларни қутқаришга ҳаракат қилишаётганини айтди.
Давлат электр таъминоти провайдерининг таъкидлашича, дам олиш кунлари ўнлаб электр узатиш линиялари узилиб қолганлиги сабабли 5,7 миллиондан ортиқ абонент электр энергиясидан маҳрум бўлган, бироқ душанба куни жабрланганларнинг қарийб 75 фоизига электр таъминоти тикланган.
