Венгрия парламенти Швециянинг НАТОга аъзо бўлиш истагини маъқуллади

Венгрия парламенти 26 февраль куни Швециянинг НАТОга аъзо бўлиш ҳақидаги аризасини маъқуллади.

Ушбу қарорга 188 нафар депутат «маъқул», олти нафар халқ вакили «қарши» овоз берди.

Шундай қилиб, Венгрия НАТОнинг 31 та давлати ичида Швециянинг Шимолий Атлантика альянсига аризасини маъқуллаган охирги бўлди.

Финляндия ва Швеция 2022 йил май ойида биргаликда НАТОга аъзо бўлиш учун ариза топширган. Хелсинки 2023 йил 4 апрелда альянсга расман қўшилди.

2024 йилнинг январида Туркия Швециянинг иттифоққа киришини маъқуллади. Венгрия Стокголм аризасини ратификация қилмаган охирги давлат бўлди.

Венгрия парламентидаги овоз беришдан сўнг Швеция Бош вазири Улф Кристерссон буни ўз мамлакати учун тарихий кун деб атади.