Венесуэла ХВЖ билан алоқалар тикланганидан сўнг ўз активларига кириш имкониятига эга бўлади

Венесуэла ҳукумати Халқаро валюта жамғармаси (ХВЖ) билан алоқалар тикланганидан сўнг ўз активларига кириш имкониятига эга бўлади.

Бу ҳақда ХВЖ расмий вакили Жули Козак журналистлар учун ўтказилган брифингда маълум қилган.

Унинг айтишича, Венесуэлага ХВЖда ажратилган SDR (махсус қарз ҳуқуқлари, фонднинг ҳисоб-китоб бирлиги) тахминан 4,9 миллиард долларга тенг. "Фонд Венесуэла билан ҳамкорликни тиклаганидан сўнг, мамлакат ҳокимияти ўз SDRларига кириш имкониятига эга бўлади", — деган у.

Козак таъкидлаганидек, Венесуэла ҳукумати легитимлигини тан олиш масаласида фонд "ХВЖда кўпчилик овозни ташкил қилувчи халқаро жамоатчилик фикрига асосланади".

Аввалроқ АҚШ Молия вазири Скотт Бессент Reuters агентлигига берган интервьюсида, АҚШ ҳукумати ХВЖда блокланган Венесуэла SDRларини хорижий валютага айлантиришни режалаштираётганини, бу маблағларни мамлакат иқтисодиётини тиклашда ишлатишини маълум қилган эди.