Ўзбекистонлик ҳакам Клублар ўртасидаги Жаҳон чемпионатида навбатдаги ўйинга тайинланди

Айни кунларда Америка Қўшма Штатларида Клублар ўртасидаги Жаҳон чемпионати бўлиб ўтмоқда. Турнирда Илгиз Танташев бошчилигидаги ўзбекистонлик ҳакамлар бригадаси ҳам иштирок этишмоқда.

Илгиз Танташев ва Андрей Сапенко Жаҳон чемпионатининг 1/4 финал ўйинида ишлайди. Ўзбекистонлик ҳакамлар 5 июль куни бўлиб ўтадиган “Палмейрас” ва “Челси” жамоалари ўртасидаги баҳсда фаолият олиб боради.

Бош ҳакам: Алиризо Фағони (Австралия)
Қанот ҳаками: Антон Шетинин (Австралия)
Қанот ҳаками: Эшли Бечим (Австралия)
Захира ҳаками: Илгиз Танташев (Ўзбекистон)
Захира ҳаками ёрдамчиси: Андрей Сапенко (Ўзбекистон)

Маълумот учун, Илгиз Танташев бошчилигидаги ҳакамлар бригадаси бунгача 3 та баҳсда ишлади. Хусусан, улар мусобақанинг гуруҳ босқичи доирасидаги “Флуминенсе” — “Боруссия Дортмунд” (бош ҳакам), “Интер Майами” — “Порту” (захира ҳаками) ва “Интер” — “Ривер Плейт” (бош ҳакам) жамоалари ўртасидаги баҳсларда фаолият олиб боришган эди.