Ўзбекистонда телекоммуникация операторларига халқаро Интернет тармоқларига тўғридан-тўғри уланиш ҳуқуқи берилди

Бу ҳақда Вазирлар Маҳкамасининг қарори қабул қилинди.

Қарорга мувофиқ, синов тариқасида, Ўзбекистон ҳудудида фаолият юритаётган, мобил ва (ёки) симли телекоммуникация тармоқларига эга, аммо халқаро Интернет тармоқларига тўғридан-тўғри уланиш ҳуқуқига эга бўлмаган операторларга 2030 йил 1 январгача ўз тижорат эҳтиёжлари учун халқаро Интернет тармоқларига тўғридан-тўғри уланишга рухсат берилди.

Синовда иштирок этишни истаган телекоммуникация оператори қуйидаги шартларга риоя қилиши лозим:

🔹 Ушбу қарор иловасида келтирилган Интернет тармоқларига тўғридан-тўғри уланиш бўйича вақтинчалик талаб ва шартларга амал қилиши;

🔹 "Ўзбекистон телекоммуникация тармоқларини бошқариш республика маркази" давлат унитар корхонаси (ишчи орган) билан қуйидагиларни ўз ичига олган ёзма келишувга эришиши шарт:

• талаб ва шартларнинг бажарилиши;

• амалга ошириладиган мониторинг;

• томонларнинг ҳуқуқ ва мажбуриятлари;

• шартнома шартларини бузганлик учун белгиланган чоралар.