Ўзбекистонда кўчмас мулк ва автотранспорт учун ижара тўлови энг кам ставкалари оширилди

Ўзбекистонда давлат бюджети тўғрисидаги қонун билан 2025 йилда кўчмас мулк ва автотранспорт воситаларини ижарага берувчи жисмоний ва юридик шахслар учун ижара тўловининг энг кам ставкалари белгиланди. Ушбу ставкалар 2024 йилдагига нисбатан 10—12,7 фоизга ошди.

Турар жойни ижарага бериш бўйича энг кам ставка қуйидагича белгиланди (1 квадрат метр учун ойига):

• Тошкент шаҳрида — 28 минг сўм (аввал 25 минг сўм эди);
• Нукус шаҳри ва вилоят марказларида — 13,5 минг сўм (12 минг сўм эди);
• бошқа аҳоли пунктларида — 5,5 минг сўм (5 минг сўм эди).

Нотурар жойни ижарага бериш бўйича энг кам ставка қуйидагича белгиланди (1 квадрат метр учун ойига):

• Тошкент шаҳрида — 45 минг сўм (40 минг сўм эди);
• Нукус шаҳри ва вилоят марказларида — 26,5 минг сўм (23,5 минг сўм эди);
• бошқа аҳоли пунктларида — 11 минг сўм (10 минг сўм эди).

Енгил автомобилни ижарага беришнинг энг кам ставкаси ойига 858 минг сўм (780 минг сўм эди), микроавтобус, автобус ва юк автомобили учун 1 млн 705 минг сўм (1 млн 550 минг сўм эди) этиб белгиланди.

Ушбу ставкалар жисмоний ва юридик шахсларнинг мол-мулкни ижарага беришдан олинган даромадларига солиқ солиш мақсадида қўлланилади ҳамда кўчмас мулкдан текин фойдаланиш шартномаларига (бундан яқин қариндошлар ўртасидаги тузилган шартномалар мустасно) нисбатан татбиқ этилади.