Ўзбекистон аёллар терма жамоаси FIDE рейтингида тарихий ўринга кўтарилди

Халқаро шахмат федерацияси (FIDE) томонидан 2026 йилнинг январь ойи учун янги рейтинг эълон қилинди.

Қувонарлиси, Ўзбекистон аёллар терма жамоаси янгилиланган рейтингда ўз тарихида илк бор Топ-15`таликка кирди. Қатарда якунига етган рапид ва блиц бўйича жаҳон чемпионатида умумий ҳисобда яхши қатнашган аёллар терма жамоамиз 12-ўринга кўтарилиб олди.

Таққослаш учун, ўтган йилнинг шу пайтида эълон қилинган жаҳон рейтингида терма жамоамиз 38-поғонани банд этганди. Ушбу рейтинг кучли 10 нафар шахматчимизнинг ўртача рейтинги асосида тузилган. Умида Омонова жаҳон чемпионатининг блиц баҳсларида кучли саккизталикдан жой олганди. Бу ҳам Ўзбекистон аёллар шахмати учун тарихий натижа ҳисобланади.

Янгиланган рейтингда АҚШ терма жамоаси пешқадамлик қилмоқда. Ҳиндистон иккинчи, Хитой шахматчилари эса учинчи ўринни эгаллаб турибди.