Ўзбекистон Миллий Олимпия қўмитасида Англиянинг гранд клубларидан бири — «Манчестер Сити» вакиллари, шунингдек, «Kinkladze Global» ва «SMH Sports» компаниялари делегацияси билан расмий учрашув бўлиб ўтди.
Юқори мартабали меҳмонларни қабул қилишда мамлакат Спорт вазирлиги, МОҚ ҳамда Ўзбекистон футбол ассоциацияси (ЎФА) раҳбарияти иштирок этди.
Музокараларнинг бош мавзуси Ўзбекистонда профессионал футбол тизимини янги босқичга олиб чиқиш, иқтидорли ёшларни аниқлаш (селекция) ва маҳаллий мураббийларнинг малакасини оширишдан иборат бўлди. Бундан ташқари, учрашувда дунёга машҳур «City Football Group» холдинги билан тўғридан-тўғри алоқаларни йўлга қўйиш, юртимиз клублари ва «Манчестер Сити» ўртасида шериклик битимларини имзолаш ҳамда инглиз клубининг замонавий методикаси асосида ёш футболчиларни тайёрлаш дастурларини жорий этиш масалалари атрофлича муҳокама қилинди.
Англия клубининг ҳамкорлик дастурлари бўйича директори Жонатан Смит ўзбек футболи сўнгги йилларда халқаро майдонда катта ютуқларга эришаётгани ва жаҳон ҳамжамияти диққат марказига тушганини эътироф этди. Унинг сўзларига кўра, меҳмонларда Ўзбекистондаги иқтидорли ёш авлод вакилларининг салоҳияти катта қизиқиш уйғотган.
Маълум қилинишича, инглиз делегациясининг юртимизга ташрифи фақат расмий учрашув билан чекланиб қолмайди. Меҳмонлар пойтахтдаги замонавий «Олимпия шаҳарчаси» инфратузилмаси, «Пахтакор» ва «Бунёдкор» клубларининг машғулот базалари билан танишади. Шунингдек, дастур доирасида республика ҳудудларидаги қатор футбол клублари фаолиятини ҳам кўздан кечириш режалаштирилган.
Ҳусановга жиддий рақобатчи келади
Шоҳжаҳон Эргашев: "Шаҳрамнинг жангини кўриб, шуни тушундим-ки..."
Суперкомпьютер футбол бўйича ЖЧда ким ғолиб бўлишини айтди
