Беш-олти кунлик “инвентаризация”дан сўнг UzAuto Motors яна нарх ошишини эълон қилди. Ўзи шундоғам бола-чақасининг ризқидан қийиб, қарз олиб, “викупка” қилиб, зўрға машина олаётган фуқаролар монополчи автозаводимиз ва унинг раҳбарларини бисотларидаги “ширин” сўзлар билан эслаб қўйган бўлсалар ҳам керак. Баъзи моделларнинг нархи 20 фоизгача ошганини нима билан изоҳлашар экан?!
"Ўзавтосаноат" АК бошқаруви раиси 2018 йилнинг июл ойида, GM автомобилларига навбатдаги нарх ошиши олдидан халқаро пресс-клуб йиғилишида айтган сўзларини бир ёдга олсак...
Ўшанда Шавкат Умурзоқов 2019 йилда маҳаллий автомобилларга нархларни туширишга ваъда берган эди.
"Келгуси йилда турли хил чегирмалар пайдо бўлишига ваъда бераман, нархларни пасайтиришга ҳаракат қиламиз. 2019 йилда ҳаммаси қандай ўзгаришини ҳис қиласиз ”, деган қоп-қоп ваъдаларни берган эди.
Ўша гапнинг эртасига GM автомобиллари нархи ўртача 14 фоизга кўтарилган эди.
Умурзоқовнинг ўшанда оғзини тўлдириб, тарихда биринчи марта "Ўзавтосаноат" таркибий ишлаб чиқарувчилардан 20 фоизлик чегирма олгани, бу эса автомобил нархини 9 фоизга пасайишига олиб келишини мақтанган эди.
Хўш, мана икки йил ўтди. Нархлар тушдими? Ҳамма битта-битта автомобил сотиб олиб, маза қилибюрибдими? Тушингизни сувга айтинг! Мана UzAuto Motors яна нархларни ошириб ташлади. Ўзи шундоқ ҳам “ўзимизнинг” машинани чет элда сотилишидан қимматга оламиз.Энди янада қимматлашишига нима сабаб бўлди?
"Ўзавтосаноат" АК бошқаруви раиси икки йил олдин “пул маблағи етишмовчилиги бор”, деган эди. Жаноб Умурзоқов, қанақасига маблағ етишмовчилиги бўлсин? Ахир сизнинг корхонангиз ҳали ясалмаган машина учун пулни илгариям, ҳозир ҳам олдиндан оляпти-ку! Ўша пуллар қаёққа кетяпти?! Нега бутун дунёдаги автомобил заводлари сиздек олдиндан пул олиб ишламаса ҳам, нархлари ошиб кетмайди?! Нега қўшнилар масалан, Россия ўзида ишлаб чиқарилган автомобиллар учун 0 фоизли кредитлар берса ҳам нархи 21 фоизга ошмайди?
Яна қизиғи, энг бозорбоп, халқчил машиналарнинг нархи кўтарилган. Юқори нарх сегментидаги автолар – Malibu 2, Tracker, Trailblazer, Equinox, Traverse ва Tahoe нархлари ўзгаришсиз қолган. Тўғри-да, бойларни қийнаб нима қиламиз?
Оддий халқнинг чекига тушгани сабр қилиш ва... навбатдаги нарх ошишини кутиш.
Манба: azon.uz
