«Унабомбер» лақаби билан танилган 81 ёшли террорчи Теодор Качинский қамоқда вафот этди. Бу ҳақда ABC News хабар берди.
АҚШ Федерал қамоқхоналар бюроси вакилининг таъкидлашича, у 10 июнь куни эрталаб камерасида ўлик ҳолда топилган. Качинский 81 ёшда эди.
Матбуот томонидан «Унабомбер» (Unabomber — «University and airline bomber» сўзларидан ясалган қисқартма) лақаби берилган математик, файласуф, ижтимоий танқидчи Теодор Качинский 1942 йилда Чикагода туғилган.
1978 йилдан 1995 йилгача университетлар ва авиакомпанияларга почта орқали 16 та бомбани жўнатган. Посилкаларнинг портлаши оқибатида 3 киши ҳалок бўлди, яна 23 киши яраланди. У уйи ёнида йўл қурилаётгани сабабли бундай кескин чораларни кўришга қарор қилганини айтди.
Качинскийни қўлга олиш учун 1 миллион доллар мукофот таклиф қилинди. Аммо уни узоқ вақтгача ушлашнинг иложи бўлмади. Фақат укаси Федерал қидирув бошқармасига (ФҚБ) хабар берганидан сўнг, Качинский қўлга олинди. 1996 йилда у 8 та умрбод қамоқ жазосига ҳукм қилинган эди.
