Украинанинг икки вилояти Россия ҳужумидан кейин электр таъминотисиз қолди

Украинанинг Днепропетровск ва Запорожье вилоятлари чоршанба оқшомида Россия томонидан энергетика инфратузилмасига берган зарбаси натижасида деярли тўлиқ электрсиз қолди.

Бу ҳақда Украина энергетика вазирлиги маълум қилди.

"Муҳим инфратузилма захира қувват билан ишламоқда", — дейилади баёнотда.

Вазирликнинг қўшимча қилишича, зарарни текшириш ва тиклаш ишлари "хавфсизлик вазияти рухсат берган заҳоти" бошланиши мумкин.

Днепропетровск ва Запорожье вилоятларида ҳаво ҳужуми ҳақида огоҳлантириш ўз кучида қолмоқда.