Украина Хавфсизлик хизмати: 2025 йил бошидан бери Россия нефт саноати объектларига 160 марта зарба берилди

Украина Хавфсизлик хизмати (СБУ) раҳбари Василий Малюкнинг сўзларига кўра, сентябр ва октябр ойларида Россиядаги шундай 20 та объект нишонга олинган, жумладан, 6 та нефтни қайта ишлаш заводи, 2 та нефт терминали, 3 та нефт базаси ва 9 та нефт насос станциясига ҳужум қилинган.

Малюкнинг айтишича, Украина зарбалари натижасида Россия ички бозорида нефт маҳсулотлари таъминотида 20 фоиздан ортиқ танқислик юзага келган, мамлакатнинг 57 минтақасида нефт маҳсулотлари тақчиллиги юзага келган ва йил охиригача бензин экспортига тақиқ жорий этилган. Шунингдек, Россия нефтни қайта ишлаш қувватларининг 37 фоизи тўхтаб қолган.

СБУ раҳбарининг қайд этишича, Украина дронларига энг самарали қаршиликни Россиянинг “Панцир” зенит-ракета мажмуалари кўрсатмоқда.

"Йил бошидан ҳозиргача биз душманнинг 48 фоиз “Панцир” тизимларини йўқ қилдик. Бу ҳозирда устувор йўналиш бўлиб, бу Украина президенти томонидан белгиланган", — деди Василий Малюк.