Путин 97 ёшгача ҳокимиятда қолмоқчи?!

Россия президенти Владимир Путин 2050 йилгача ҳокимиятда қолишни хоҳлайди. Бу ҳақда суриштирув журналисти Иля Давлятчинга таяниб, Daily Star хабар берди.

Журналистнинг айтишича, Иосиф Сталин давридан бери Кремлни энг узоқ муддат бошқараётган 73 ёшли Путин ҳокимиятни 97 ёшгача сақлаб қолишни истайди. Шундан сўнг эҳтимол уни ўғли Иванга топширмоқчи. Иван ҳозирда 10 ёшда, 2050 йилга келиб эса 35 ёшга тўлади.

2020 йилда Путиннинг президентлик муддатларини “нолга тушириш” билан ўзгартирилган амалдаги конституция унга 2036 йилгача, яъни 83 ёшгача президентлик лавозимини эгаллаш имконини беради.

Путин аллақачон ҳокимиятда бўлиш муддати бўйича Пиночет (17 йил), Ким Чен Ир (17 йил), Бенито Муссолини, Индонезия президенти Сухарто (20 йил) ва Руминияни 24 йил бошқарган Николае Чаушескудан ўзиб кетган. Путин бешинчи муддати охирида Мао Цзедунни ортда қолдириши, олтинчи муддатда эса ҳар бири 36 йилдан ҳукмронлик қилган Франциско Франко (Испания) ва Антонио ди Салазарга (Португалия) етиб олиши мумкин.

Агар Путин 2050 йилгача ҳокимият тепасида қолса, у Муаммар Каддафий (42 йил), Ким Ир Сен (46 йил) ва Фидел Кастрони (49 йил) ортда қолдириб, Россияда Иван Грозний давридан бери энг “узоқ ҳукмронлик қилган” раҳбарга айланади. Иван Грозний 50 йил ҳукмронлик қилган.